Posted 11:01 PM by Mehran Baharlı

ایصفاهان خاطیره لری

1-ایکی ایل اؤنجه ایصفاهان بیلیم یوردونون آزربایجانلی اؤیره نجیلرینین چاغیریشی ایله 9 نفرلیک بیر قوروپ ایله موسیقی کونسئرت اوچون بو بؤلگه یه چاتدیق.

اؤیره نجی لر چوخلو امک قویوب موجوویز آلدیقدا بیر بؤیوک ورزیش سالونون کیرایه ائده ره ک صندل ایله دولدوروب، ائله جه ده سس سیستئمیني قوشدورموش و هر بیر شرایيطی کونسئرت اوچون دوزه نله میشدیلر.

کونسئرتین باشلانیشینا اوچ ساعات قالمیش خبر گلدی کی، موجوویز باطیل و کونسئرت لغو اولوبدور. سایین سولئیمازلده و یواداشلاری چوخلو چالیشدیقدان سونرا، کونسئرتین باش توتا بیلمه یه جه ییني بیلدیردیکده، بئله بیر حورمتسیزلیيه لعنت ديیه ره ک تبریزه دؤنمه يه قرار وئردیک.

2- بیر آی اونجه بیر داها ایصفاهاندان کونسئرت اوچون چاغيریش آلدیم.

بو دونه آزربایجان مدنییتینه اوره ک یاندیران سایین مجید ماکوئی (ائلیار) بو آغیر قایغی کئشیکلیيی اؤز اوزه رینه گؤتورموش ایدی.

پيروقرام بیر نئچه اوستان آراسیندا فولکلور تانیشلیقلاری ایدی.

سحر ائرته ایصفاهانا چاتیقدا، ائلیار بیزی قارشیلادی. ایصفاهان بیلیم یوردوندا یئر به یئر اولوب سرگی ائوینه (نمایشگاه) گئدیب اؤلکه میزین بیر نئچه غئیرتلی جاوانین الیله قوراشدیریلمیش طنطنه لی و آزربایجانین 4 اوستانین تمثیل ائده ن گؤزه ل بیر غورفه ایله اوز به اوز اولدوق و بو گؤزه للیک موسیقی قوروپونو جوشدوراراق یاریم ساعاتلیق چیخیش ائدیب سرگی سالونونا یئنی بیر روح باغیشلادی.

بئش گونلوک سرگینین سونا چاتما (اختتامیه) پيروقرامیندا بیر نئچه اوستانین موسیقی قوروپو اورتاقلیق ائمیشدی و بو چیخیشلارین سون بولومو بیزیم قوروپا دوشموش ایدی.

قوروپلار بیر – بیرینین آردیجا چیخیشلاریني ائتدیلر، بیزیم چیخیش ائده جه ییمیزه 40 دقیقه لیک وقت قرار وئریلمیشدی، چیخیش اورتاسیندا یعنی 20 دقیقه سونرا تاماشاچیلارین مدنی، عئین حالدا شورلو آلقیشلاریني گورن مسئوللار قیجیقلاناراق چالقییا سون قویماغی ایسته دیلر. چوخ دئییب ائشیتدیکدن سونرا آزربایجان مارشینین اوخونماسینا 4 دقیقه لیک ایذین آلدیق، مارشین اورتاسیندا سس سیستئمیني سؤندوروب سئنین پرده سیني چکه ره ک، اوخویان سئن اوسته قالدی بیز ایسه پرده نین آرخاسیندا، مارش یاریمچیلیق قالماسین دییه پرده نی دارتیب اؤزوموزو اوخویانا چاتدیریب مارشی و چیخیشی سونا چاتدیردیق.

بئله لیکله ایکینجی دونه اولاراق مین کیلومئتر یول گلیب ایصفاهان مسئوللارینین بیر داها بیزه قارشی حورمتسیزلیيینین شاهیدی اولدوق.

موسیقیمیزه عئشق اولسون

ایصفاهان 2/8/85 دمیرچی

•